العمر فرصه والليالي ما تدوم

ماضيقت صدر السما كثر النجوم****ولا عزت الانذال كثر اموالها

فالناس معطي مثل مافيه محروم****وراع المراجل شارب ن فنجالها

ياصاحبي في كل ليل وكل يوم****وانا هواجيسي على مدهالها

تشوقني قبله مراديف الغيوم****وارقب مناشيها واخيل خيالها

كم واحدن جيبه من المال معدوم ****وليا بغى حاجة بعزمه نالها

وكم واحد ن ماله ملايين الرقوم****وهوه لك الله حالته يرثالها

اثر الرجال الي يميزها العزوم ****وتفرق بعضها عن بعض بأفعالها

مثل الجمال وفرقها وقت اللزوم ****والا بعضها ماتحكمها أشكالها

جمل ....لابرّك للحموله مايقوم ****وجمل ....لا برّك للحموله شالها

والمرجله بوجيه اهلها الها وسوم ****الي منازيل الشرف منزالها

والا الرخوم ان طالت المده رخوم ****ماتنفعك في اقفايها واقبالها

والي يجيبون ويودون العلوم ****ماسرها طول السنين اقوالها

نجد العذيه لو لواهيب السموم ****كثرت بها مازعزعت بجبالها

والادمي يخطي ولاهوب معصوم ****دام البشر تجزي بقدر اعمالها

وانا من رجال ن طحا طيح وقروم ****يشهدلها في نجد فعل ابطالها

جدي على طاري الفخر عقيد قوم ****على النقا والخيل من خيالها

وقسمي مع اهل الطيب من خير القسوم ****ولأوله عادتنا نسعالها

العمر فرصه والليالي ماتدوم *****واهل الغنايم طيب الله فالها

وماضيقت صدر السما كثر النجوم ****ولاعزت الانذال كثر اموالها


الشاعر: سلطان بن هادي بن عقيل ابن بشير