قصيدة فر قلبي
فر قلبي فرة اللي في الهواء مفترة
ما يوردها علياني و لا جفالي
كونكورد صمموها صانعين الذرة
و استعدت تطوي الأمتار و الأميالِ
و استلمها كابتنٍ تصميمها ما غره
يتفنن في قيادتها بدون إشكالِ
فرها فوق المدرج مرتين و مرة
لين عرّض جنبها صفق الهبوب العالي
و جر قلبي جر قوسٍ في يد اللي جرّه
يوم جاز له اللحن و الراس ما هو خالي
ما يشوف من السما لو كان كبر الذرة
نايشه ضيم الزمان و فاقدٍ له غالي
الفراق أكبر مصيبة و الجفيّا مرة
تهدم ال... الكبير و توجع الرجالي
مثل ما شفت الجفا في عيونها المحمرّة
مثل قولة روح في فالك و أنا في فالي
لا تذكّرني ليا احرقك الزمان بحرّة
و إنس حتى سنترال البيت و الجوالِ
و إنس فزعاتٍ توسّع خاطرك و تسرّه
يوم تنخاني و أطوح غترتي و عقالي
هب يا هذا الزمان .. الله يكافي شرّه
بعد كان البرق برقي و الخيال خيالي
