اترككم مع القصيدة . . .
حاولت ان أنسق القصيدة لكن لم استطع أمل من أحد الاخوان المشرفين تنسيقها
كريم يا برقً شعق وسط هتان = مزنه ركم ما جفلته الهبايب
نوضه لعج من لمعة سيوف شجعان = وهتان ديمه دم وبل السحايب
يرعد عزاوي والنخاوي لعتبان = يا حي ابوها روق عوق الكتايب
طلال يشهد بالوغى نار بركان = يرجف به الزلزال والأمن سايب
الموقف اللي فيه روغاتالأذهان = في حزةٍ والموت حاضر وغايب
يوم صمدت روق الأبيه بصبيان = وثلاث الاميه كل ابوهم قرايب
لجمعٍ يسد الريع والوضع شتان = ثمان آلاف وجدعوهم نهايب
وبانت فعول طيور شلوى وحوران = زحول الرجال تبان وقت النوايب
القاع يا شالح من الدم رويان = والروس من عمهوج صارت نصايب
واللي عتق صدر من العد ضميان = من عقب ما راسه من الهول شايب
وتفهقت سحابة العز بعنان = وتعشت ذيابه وحامت لوايب
فعلاً يخلي راعي القاف طربان = شليويح سطرها وزدت اللهايب
والشاعر اللي ما وصف مجدعتبان = يا عنك عن شعره يسوق الضرايب
ولابد ما بالحرب رابح وخسران = ومن طاول أطول منه مفلس وخايب
وما غبت يا شالح وربعك عضيان = والضيط بن نايف وقف عنك نايب
السمن صبه فوق يمنى الربيعان = اللي على المضيوم يظفي طرايب
وعده على الشغار في وسط صيوان = بدرً طلع ما هو عن الطيب تايب
وسقها على الوهاب والعلم نيشان = اصايله سمحات بالجود طايب
وثنه على العشاي والراس خرمان = اساعده والطيب والله وهايب
وعرج على ابو خشيم لو انت عجلان = مراشده والوقت مخطي وصايب
وابن محيا لا تعزوى بميدان = خيال للحرداء يدوس الحرايب
وابن نجم نجمه سطع بالسماء بان = ضاري لشب النار والسمن ذايب
وحبة خشم لربوعنا قوم غشوان = لبيوتهم دايم نسوق الركايب
وما دام لابن زريبه جيش جذعان = عدوهم ينكف جروحه عطايب
ومهادلة عز الوغى صاحب الشان = مشوا فيافي نجد والدم رايب
والتوم تلفيه التحيات قيفان = شيخ الحفاه اللي تحل الصعايب
وسلم على برقا عمومً وفتيان = اللي لهم هيبه تهز الطنايب
وما دام لابن حميد جاهً وسلطان = ما به عتيبي صار ضلعه حطايب
هذي عتيبه لا غطى الجو دخان = تدرك أمورً كل ابوها طرايب
هوازنً نعم النسب نسل عدنان = اصايلً ما خالطتهم شوايب
لطامة العايل وذباحة الضان = مشرعه بيبانهم للصحايب
افواجهم ثمانية ساس وأركان = دوله وسط دوله لقهر الطلايب
ومزاين الهيلا دحر كل طوفان = الثامنه في كون سبع العجايب
وتبقى هي الهيلا على مرالأزمان = الجوخ يزمي والمفالي كسايب
اشهد لهم في حفل بندر بليهان = نعمً بابو تركي وذيك الصلايب
هذا ولد فياح نسل العضيان = شوق الهنوف اللي تكد الذوايب
وجيته على يمناي بدر النقيثان = عانين يمه معتلين النجايب
وغنيتها واثق وجدي مليحان = قدمي هلا الهيبه ولاني بهايب
لأني من ربوعً لها المجدعنوان = تميم درع الدين وقت النشايب
هامة مضر حامت على خيرالاديان = الهضبه اللي فوق كل الجذايب
ذرى الشريعه والحقايق ببرهان = شهد لهم خير البشر بالنسايب
وان كانها صوله وجوله وطغيان = بنوا لهم تاريخ والوقت عايب
والحمد لله دارنا خير الاوطان = في ظل اخو نوره نفل العصايب
عيشة رغد ننعم بها بأمن وآمان = ما دام كل الشعب صاروا حبايب
ويالله تحفظ الدين من كل فتان = ويارب جنبنا الفتن والمصايب
وصلوا على المبعوث للانسوالجان = شفيعنا يأهل القلوب اللبايب